ગર્ભસ્તુતી

શ્રી ગણેશાય નમઃ ।
દેવા ઊચુઃ ।
જગદ્યોનિરયોનિસ્ત્વમનન્તોઽવ્યય એવ ચ ।
જ્યોતિઃસ્વરૂપો હ્યનિશઃ સગુણો નિર્ગુણો મહાન્ ॥ ૧॥

ભક્તાનુરોધાત્સાકારો નિરાકારો નિરઙ્કુશઃ ।
નિર્વ્યૂહો નિખિલાધારો નિઃશઙ્કો નિરુપદ્રવઃ ॥ ૨॥

નિરુપાધિશ્ચ નિર્લિપ્તો નિરીહો નિધનાન્તકઃ ।
સ્વાત્મારામઃ પૂર્ણકામોઽનિમિષો નિત્ય એવ ચ ॥ ૩॥

સ્વેચ્છામયઃ સર્વહેતુઃ સર્વઃ સર્વગુણાશ્રયઃ ।
સર્વદો દુઃખદો દુર્ગો દુર્જનાન્તક એવ ચ ॥ ૪॥

સુભગો દુર્ભગો વાગ્મી દુરારાધ્યો દુરત્યયઃ ।
વેદહેતુશ્ચ વેદશ્ચ વેદાઙ્ગો વેદવિદ્વિભુઃ ॥ ૫॥

ઇત્યેવમુક્ત્વા દેવાશ્ચ પ્રણેમુશ્ચ મુહુર્મુહુઃ ।
હર્ષાશ્રુલોચનાઃ સર્વે વવૃષુઃ કુસુમાનિ ચ ॥ ૬॥

દ્વિચત્વારિંશન્નામાનિ પ્રાતરુત્થાય યઃ પઠેત્ ।
દૃઢાં ભક્તિં હરેર્દાસ્યં લભતે વાઞ્છિતં ફલમ્ ॥ ૭॥

ઇત્યેવં સ્તવનં કૃત્વા દેવાસ્તે સ્વાલયં યયુઃ ।
બભૂવ જલવૃષ્ટિશ્ચ નિશ્ચેષ્ટા મથુરાપુરી ॥ ૮॥

॥ ઇતિ શ્રીબ્રહ્મવૈવર્તે દેવકૃતા ગર્ભસ્તુતિઃ સમ્પૂર્ણા